Devletlu Meḥmed Ḥüsrev Paşa ḥażretleriniŋ Kavasbaşısı Aḥmed Aga nām sāhibü’l-ḫayrıŋ Çengel ḳaryesinde Çakal Ṭaġı nām maḥalde mutaṣarrıf olduḳları mülk bāġı derūnunda mücedded ḥafreyledigi yedi ʿadet biʿr-i mādan ḥāṣıl olan mā-ı leẕīẕ ḥasbetenlillāh ve ṭaleben li-merżātihi ḳarye-i mezbūrede inşāsına muvaffaḳ olduḳları iki ʿaded çeşme ve bir muṣluk ve bir savaġa cereyān etdirmiş ve mütevellīsi yedinde olan vaḳfiye-i māʿmūl bahāsı manṭūḳunca vaʿż olunan yüz biŋ ġurūşuŋ viḳāyesiyle nemāsından muḥtāc-ı taʿmīr ve termīm olacakları ṣu yolları maṣārifine ṣarf ve mürūr-i ezmine ile mā-ı leẕīẕ-i mezbūruŋ menba’ından veyāḫūd fażlası vardır denilerek bir damlası maḥall-i āḫere naḳl ve sirḳat olunmamaḳ eger ictisār ederi olur ise dū cihānda maḳḥūr u düçār-ı züll ü ḫasār olsun āmīn. Ber-minvāl-i muḥarrer ḳarye-i mezbūrede kāʾin bi’l-cümle kebīr ve sagīr İslām ve re’āyā ṭaraflarından daḫi neẓāret ve diḳḳatle mütevellīsi ṭarafından şāyet vaḳfiye-i mezbūruŋ hilāf-ı ḥareket zuḥūrunda mütevellīsi ve mumāileyhiŋ ol vechile vāḳi’ olan sūʿ-i ḥareketinde mümānaʿat olunmaḳ üzere cümleniŋ manẓūr ve maʿlūmu olmak için işbu ṭaşa ḥak ve imlā ve bu maḥalle vaz’ olunmuştur 1270