Şāhenşeh-i Dārā-ġulām İskender-i gerdūn-maḳām Dādār-ı Behrām-intiḳām ḫāḳān-ı kerrūbī-ḫiṣāl Şāhān-ı dehriŋ mefḫarı ʿaḳl u kerāmet maẓharı Tevfīḳ-i Ḥaḳ’dur rehberi etmekde şerʿa-imtis̱āl Mihr-i siphr-i salṭanat nūr-ı çerāġ-ı mekremet Fermān-dih-i her memleket ẓıll-ı cenāb-ı Ẕü’l-celāl Ṣāḥib-ḳırān-ı ma’nevī mihr-i velāyet pertevi Baḫt-ı hümāyūnı ḳavī rūşen-dil ü meṣ’ūd-ḥāl Ol şāh-ı manṣūrü’l-livā leşker-keş ü ḳalʿa güşā Os̱mān-ḥayā Ḥaydar-vegā ʿĪsī-nefes Yūsuf-cemāl Pertev-fürūz-i baḥr ü ber ʿarş-āsitān eflāk-der Meh-kevkebe ḫūrşīd-es̱er saʿd-aḫter ü ferḫunde-fāl Devrinde ʿālem şādmān erbāb-ı dil hep kām-rān ʿIrż ehli ber-emn ü emān ehl-i şekāvet pāy-māl Reʾy-i münīrī ser-be-ser verdi cihāna nūr ü fer Bābın penāh etseydi ger ḫūrşīd görmezdi zevāl Fażl ü kemālātı ʿayān inşāda Vaṣṣāf-ı zamān Kilk-i teri muʿciz-beyān haṭṭ ü hünerde bī-mis̱āl Sulṭān-ı Maḥmūd-üş-şiyem kişver-sitān-ı Cem-ḥaşem Dārā-der ü Ferḫunde-dem şāh-ı Felāṭūn intiḳāl Ol tācdār-ı pür-himem Mehdī-i Efrīdūn-ʿālem Sāʿat-be-sāʿat dem-be-dem eyler cihāda iştiġāl Teşrīf-i Saʿdābād edip ṭop atmağı īcād edip [Erbābını irşād edip ol şehriyar-ı pür-kemāl] Ḳırdı sebūyu şüphesiz biŋ pāre etdi görseŋiz [Menzil yedi yüz on sekiz adım iken bī-kīl ü kāl] Seyr et o şāh-ı ʿāḳili ḥalleyledi her müşkili [Bozdu cemī’-i menzili cevlān edip Rüstem-mis̱āl] Dāʾīm eli şemşīrde aʿdāsını tedmīrde [Ṭob ü tüfeng ü tīrde taş dikti ol ṣāḥib-cidāl] ʿÖmrün Ḫudā müzdād ede iḳlīmini ābād ede [Aʿdāsını nāşād ede devr eyledikçe māh ü sāl] Ey Ḫusrev-i Behrām-ḫū de dāver-i iʿcāz-gū Hālet ḳulun çoḳdan berü olmuş idi mebhūt ü lāl Pāyende olsun devletiŋ āfāḳı ṭutsun himmetiŋ Şevḳe getirdi raġbetiŋ oldum yine Şevket-ḥayāl Yapdım iki tārīḫ ben evvelkisi dürr-i ʿAden Cemʿ olsa cümle ehl-i fen naẓm eylemek emr-i muḥāl Çatlasın aʿdā ṭopıla Maḥmūd Ḫān ḳırdı sebū Destiyi urdu ṭop ile Sulṭān-ı Maḥmūdü’l-fiʿāl 1227