Sulṭān Meḥmed ol şeh-i ṣāḥib-ḳırān kim Ḥāmīsi idi millet-i beyżā-i Aḥmed’üŋ Fetḥ itdi Egri Ḳal‘ası’nı ḍarb-ı tīġ ile A‘dāsın itdi ṭu‘ma-i şemşīr o serḥadüŋ Gerd-i semendi sürme idi çeşm-i aḫtere Tāc idi ayaġı tozı ferḳateyne ferḳadüŋ Dest-i ecel-i dirīg ki ṭayy itdi nāgehān Menşūr-ı ‘ömrin ol şeh-i ḫurşīd-mesnedüŋ Nefret ḳılup meşāġil-i dünyā-yı dūndan İrdi na‘īm ü rāḥatına mülk-i sermedüŋ Ḳaldı ṣaḥīfe-i varaḳ-ı rūzigārda Ās̱ār-ı ‘adl ü dādı o şāh-ı mü’eyyedüŋ Emr itdi ḫāk-i merḳadi üzre binā Bu türbe-i refī‘ ve binā-yı müşeyyedüŋ Sulṭān Aḥmed ol şeh-i gerdūn-serīr kim Ferzend-i cānşinīdir ol şāh-ı emcedüŋ Ḫāḳān-ı ‘arş-mertebe kim penç nevbeti Bāmında çalınur heft felek künbedüŋ Ḥaḳḳ taḫt-ı salṭanātda anı pāyidār idüp Ṭurduḳça nüh revāḳı bu ṭāḳ-ı zebercedüŋ Ṣubḥ-ı nüşūra dek ola pür-nūr u pür-żiyā Envār-ı raḥmet ile derūnı bu merḳadüŋ Ḥükmī görüp bināsını tārīḫ içün didi Firdevs oldı merḳadi Sulṭān Meḥmed’üŋ 1017