Mihr-i sipihr-i mecd ü şān Sultān Maḥmūd-ı zamān Her ḳavli her fiʿli hemān nāmı gibi Maḥmūd’dur Cārī zebānından kerem-i ḥavż-ı ’aṭāsı müzdeḥem Mānende-i emvāc-ı yem iḥsānı nā-māʿdūddur ʿAyn-ı velāyet menbāʿı şems-i ḥilāfet maṭlaʿı Aḫlāḳ-ı Ḥaḳḳıñ mecma’ı şāhenşeh-i mes’ūddur Bu āb u tāb-ı himmeti ḥūbī-i rūy-ı şevḳeti Cūş-ı mū’in-i fiṭnatı baḥşāyiş-i maʿbūddur Şemşīr-i ʿadl-i kā’imi eyler ḥimāyet nā’imi Feyż-i duʿā-yı dāʾimi bostān-ı mülke rūddur Eyyām-ı ʿadlinde mihen ḳılmaḳdadır terk-i vaṭan Hep sūddur fikre gelen şimdi ziyān nā-būddur Ol ’ārif-i ṣāḥib-sülūk dilden eder ref’-i şükūk Tavṣīt-i vefd ile mülūk dergāhına ruḫ-sūddur Beytü’l-ḥarāma hem imām hem ḫadīm-i beytü’l-ḥarām Peyġamberiñ emrine rām bir dāver-i pür-cūddur İcrā-yı şerʿa ḫvāstgār īs̱ār-ı ḫayra zer-nis̱ār Evṣāf-ı pāḳ-i çār-yār ẕātında hep mevcūddur Etdi bu mevkīʿde binā şādırevān-ı cān-fezā Ammā ne ḫoş ḫayrı be-cā ecri bunuñ māḥsūddur Resm-i bedī’i dil-nişīn taṣvīri gitdi tā-be-Çīn Çün ḳaṣr-ı firdevs-i berīn ḳalbe ferāh-efzūddur Saḳfı müzehheb bir ṭabaḳ ābı nebāta mā-sadak Bu ḫayr-ı pāka pekce baḳ nezd-i Ḫudā mevdūddur Bu ṣulara server midir Zemzem mi yā Kevs̱er midir Muḥyīye yā maẓhar mıdır iḥyāya mehn-i sūddur Cān-ı şerefmend-i Ḥasen rūḫ-ı Ḥüseyn-i gül-beden Bu ʿayn-ı ṣafvet-māyeden ez-cān ü dil ḫoşnūddur Ol ḫusrev-i ʿālī-nijād olsun serīr-ārā-yı dād Tā dehr içinde āb ü zād ebrār içün mevcūddur Tārīḫ-i dil-cūsun Emīn ṣu gibi takrīr eyledi Sulṭān Maḥmūd’a bu şādırvān bu ṣu da cūddur 1153