Bārekallāh zehī aḳdem-i ḫayr ü ḥasenāt Ḫayr-ı cārī-i ebed ʿayn-ı s̱evāb-ı mevʿūd Ḳıldı Ḥaḳ ḫāṣṣa-i māīʾ-i ḥayāt-ı eşyā Etdi mefhūmu anıŋ naẓm [e]ger nemīde vürūd Eyleyip himmet o şāhenşeh-i mülk-i İslām Ḳıldı bu çeşme-i zī-bendeyi ʿayn-ı mevrūd Yalıŋız cānib-i Ṭopḫāne degil çār cihet Oldu sīrāb-ı zülāl-i kerem-i nā-maḥdūd Her biri çeşmelerin oldu leṭāfetle revân Reşḥa-i luṭfı verip āteş-i ʿaṭşāna ḫumūd Cümleden oldu bu ser-çeşme makāmında bedīd Ṭarz-ı vālā-yı mülūkānesi pīrāye-nümūd Şāh-ı ferḫunde-ʿalem server-i Maḥmūd-şiyem Dāver-i seyf ü ḳalem ṣāḥib-i baḫt-ı mesʿūd Ede tevfīḳ-i Ḫüdā ol şeh-i ʿālī-şānıŋ Kevkeb-i kevkebesin ʿavn ü ẓaferle merṣūd Fer ü iclāli olup muġtenim-i baḫt-ı saʿīd ʿİzz ü iḳbāli ola muttaṣıf-ı yümn ü ṣuʿūd Nev-bahār-ı ṭarab-efzā gibi naḳş-ı ezhār Ṣafḥa-i ṣāf-ı ruḫâmında be-dīdār-ı şühūd Pür eder sāmiʿayı zemzeme-i ḥamd ü s̱enā Vārid ü ṣādır edip şükr ü sipās eyle sürūd Emr-i vācibdir o sulṭān-ı celīlüʾş-şānā Edeler ḫayrı duʿā etmede beẕl-i mechūd Devlet ü salṭanat u ʿömrünü efzūn etsin Māliküʾl-mülk-i ḥakīkī o Ḫüdā-yı maʿbūd Ṣıḥḥat ü ʿāfiyet iḥsān edip ol Rabb-i kerīm Eyleye ḥıfẓ ü emānın o şehe ḥırz-ı vücūd Zādehuʾl-lâh zehī himmet-i sulṭān-ı cihān Eyledi teşne-dilāna kerem ü reʾfet ü cūd Şems-i ẕātın ufuḳ-ı salṭanata dāʾir edip Ede teʾyīd-i Ḫüdā ẓıll-i ẓalīlin memdūd Ḫayır-ḫ˘āhānı bulup neşv ü nemā-yı cāvid Ola bed-ḫ˘āhları seyl-i ʿademde nā-būd ʿİzzet ü rifʿat ile nuṣret-i bī-ġāyet ile Ḳudret ü şevketini dāʾim ede Rabb-i vedūd Mevḳiʿinde edip icrā bu zülāl-i pākī Sū-be-sū oldu revān nice ʿuyūn-ı bihbūd Meşreb-i ṣāfı gibi herkese luṭfu cārī Ḥüsn-i evṣāfı gibi ṣafvet-i ābı mevdūd Buldu bu çeşme ile revnaḳ ü fer Ṭopḫāne Oldu sükkānı nevā-senc-i taḥiyyāt-ı Vedūd Tā hübūṭ ede zemīne ḳaṭarāt-ı emṭār Ede gülbank-i s̱enā ḫayr duʿā çarḫa ṣuʿūd Ẕātını Ḥaḳ ede maẓhar daʿvât-ı ḫayra Ẕikr-i ḫayr ü ḥasenātı ola mevḳūf-ı ḫulūd Dedi bu çeşme-i zībāya Naḥīfī tārīḫ Rāh-i Ḥaḳda ḥasenāt eyledi Sulṭān Maḥmūd Ketebehū Muṣṭafā Kātib-i sırr-ı sābıḳa 1145