Şehinşāh-ı cihān Maḥmūd Ḫān-ı ma‘delet-pīrā Mu‘allā cāy-ı dīvānı mücedded eyledi iḥyā Müşebbek revzeni zencīr-i ‘adliŋ bir ‘adīlidir Bilā-taḥrīk eder Ḥaḳ ṣāḥibin ol ḫusreve īmā Selīm Ḫān-ı cinān-menzil edip ancaḳ zemīnin ṭarḫ Müzeyyen etdi ‘adl ü dād ile şāh-ı zamān ḥālā Felekler bu mu‘allā Ḳubbealtı’ndan ‘ibāretdir ‘Adālet olmasa olmaz sipihr-i köhne pā-ber-cā Vekīl-i salṭanat ṣadreyn ü defderdār ve tevḳī‘ī Olur dīvān günü bu asūmāna encüm-i zehrā Sipihr-i şevketiŋ aḥkāmını seyr etmege gāhī Ṭulū‘ eyler verā-yı zer-ḳafesden ol meh-i ġarrā Ḥużūr-ı ḥażret-i Ḥaḳḳ’a ḳalır zīrā müzevverdir ‘Adāletgāh-ı ḫākānīde fayṣal bulmayan da‘vā Bu nev-cāyıŋ verāsı ḳulle-i Ḳāf-ı ‘adāletdir Ayağı altına düşse nola dünyā vü mā-fīhā Sipirh-i kīne-cūyı mehcesiyle dāġdār etdi ‘Alem-efrāz olunca ḳulle-i nev āiftāb-āsā ‘Iyān etdi o vālā ḳulleyi bünyād edip żımnen Nigehbān olduğun āfāḳa ol ḫāḳān-ı mülk-ārā O rütbe mülke te‘s̱īr etdi ol şehden mehābet-kim Murād etse künām-ı şīri eyler āhüvān yağmā Dilerse mīşezārı mehd eder bir peççe rūbāha Dilerse şīr-i nerri ṭıfl-ı āhūya eder lālā Ferīdūnlar o şāha ‘arż-ı ḥācet eylesün gelsin Penāh-ı pādişāhān eyledi dergāhını Mevlā İki zerrīn taṣa salṭanat tācın verirlerdi Rikābında gelüp peyk olmuş olsa Sencer ü Dārā Sıṭablında eger Pervīz olaydı bir at oğlanı Aŋar mıydı cihānda edhem-i Şebdīz’ini ḥāşā Nüvid-i fetḥ için tatar olaydı böyle ḫāḳāna Eder miydi Hülagü ‘ömrünü ılġar ile ifnā Açıŋ dest-i niyāzı dā‘īm olsun dāver-i ġāzī Sözüm ger ḥaḳ ise ey sākinān-ı ‘ālem-i bālā O ḫāḳān sıdḳ ile ḳıldı cenāb-ı Aḥmed’e ḫıdmet Kitābullāhıŋ etdi seyf ile aḥkāmını inbā Yine çıḳdım ṣadedden ḳaldı bu cāyıŋ biraz vaṣfı Alışmış medh-i ḫāḳāna zebān-ı hāme-i imlā Ṣaded bir yana dursun şevḳ u şādīden gider ‘aḳlım O şāhı yād ederken mālik olmam kendime ḳaṭ‘ā Bulaydım bāri bir mıṣrā‘-ı ra’nā cāy-ı zībāya Ḳuṣurum olsa da ‘avf eyler ol şāh-ı kerem-fermā Gören ser-dāde-i inṣāf olur ‘İzzet bu tārīḫe Mücedded eyledi dīvān yerin Maḥmūd Ḫān vālā 1235