ʿĀlemiŋ ḫāḳānı Sulṭān Aḥmed-i ʿālī-himem Kim ṣadā-yı şevket u şānıyla pürdür şeş-cihāt Görmemiştir dīde-i tāc u serīr-i salṭanat Böyle sulṭān-ı melek-ḫū ḫusrev-i ḳudsī-ṣıfāt Ḥaḳḳ’a ḥamd olsun ki hep āsāyiş ü rāḥattadır Sāye-i inṣāf ü ʿadl-i re’fetinde kā’ināt Rūḥ ol ḫāḳān-ı kāmildir cihān mānend-i ten Ḥāfıẓı ol şāh-ı ʿādildir raʿiyyet hemçü şāt Eyledi Erfāż’dan Īrān’ı ārī ser-te-ser Ḳılınır cāmiʿleri içre cemāʿatle ṣalāt Ol hizebr-i nām-ver kim ṣalvet-i şīrānesi Eylemiştir zümre-i Aʿcāmı ḍarben fīl māt Ol şeh-i ʿālem binā ḳıldı bu ʿālī çeşmeyi Kim zülāl-i ṣāfınıŋ evṣāfıdır ʿaẕb-i Fırāt Ḥabbeẕā ser-çeşme-i dil-cū ki baḫş etmektedir Lūlesi leb-teşnegāna şerbet-i ḳand-i nebāt Ḥabbeẕā ʿayn-i ḥayāt-i pāk kim şāyestedir Ḳılsalar İskender’i ṣuyolcu oŋa bā-berāt Kefçesi mānende-i dest-i kerīmān pür-ʿaşā Lūlesi hem-çün zebān-ı ehl-i dil şīrīn-nikāt Medḥini taḳrīre āciz miknet-i nuşḳ u zebān Vaṣfını taḥrīre ḳāṣır ḳudret-i kilk [ü] devāt Ḥıfẓ edip dā’im o şāhenşāhı Ḥayy-i lā-yezel Devlet ü iḳbāli rūz-i ḥaşre dek bulsun s̱ebāt Söyledi tārīḫ-i itmāmın bu mıṣraʿla Nedīm Çeşme-i vālāsı Sulṭān Aḥmed’in mā-i ḥayāt