Şehenşāh-ı hümāyūn-pāye Sulṭān Aḥmed-i Ġāzī Ki şāmildir cihāna luṭfu ebr-i nev-bahār-āsā Muʿaẓẓam şehriyār-ı maʿdelet-perver ki faḫr eyler Ferīdūn bāb-i iclālinde olmağla cebīn-fersā O ḫāḳān-ı cihānıŋ ṣıhr-ı ḫāṣ-ı mekremetkārı Vezīr-i aʿẓam İbrāhīm Pāşā-yı Felāṭūn-rā Şeref-ābād’ı ḳıldıḳta o şāhenşāh içün bünyād Oŋa bir cūy-bārı menbaʿından eyledi icrā Firāvān olmağıla āb-ı luṭf-ı şehriyārīden Ricāl-i devlet etti Üsküdār’ı sū-be-sū irvā Bu vālā çeşmesārı daḫi ol āb-ı muṣaffādan Kemāl-i zīb ile bünyād ḳıldı Muṣṭafā Pāşā Ḳapudān-ı mükerrem ṣadr-ı efḫam kim semāḥatte Kef-i cūdundan alır feyżi cūş-ı lücce-i deryā Vezīr-i bī-muʿādil ṣadr-ı kāmil kim feżā’ilde Değil hem-ser oŋa İbnü’l-ʿAmīd ü Bū ʿAlī Sīnā Melek-ḫaṣlet muʿallā-menzilet düstūr-ı pür-himmet Ki ẕāt-ı pākidir kān-ı cihānda gevher-i yektā Şehenşeh devletinde ol vezīr-i āsumān-mesned Yapıp bu çeşme-i pāki güzel ḫayr eyledi ḥaḳḳā Hemīşe şehriyār-ı ʿālem ü ṣadr-ı cihānbānı Hem ol düstūr-ı ẕī-şānı mü’eyyed eylesin Mevlā Nedīmā böyle taḥrīr eyledi tārīḫ-i itmāmın Bu dil-cū çeşmeyi yaptı Ḳapudān Muṣṭafā Paşa 1142