Şehinşāh-ı felek-şān Ḥażret-i Sulṭān Maḥmūd’uŋ Sezā taḥrīr olunsa nāmı levh-i mihr-i rahşāna Hüner-kānı maʿarif maʿdeni luṭf ü himem baḥri Selefde böyle şeh gelmiş mi taḥt-ı ʿAlī Os̱mān’a Degil meşhūd ʿadīl ü mis̱li eslāf-ı mülūk içre Nāẓir olmaz cihānda ol ḫıdivv-i nuṣret-ʿunvāna Cenāb-ı Ḥażret-i Mevlā’ya yüzbiŋ ḥamd ü şükr olsun Muvaffaḳ eyledi İslāmı böyle şāh-ı devrāna Fütuḥ-ı fevż ü nuṣret tīġ-i zūr ü ḳahrına cevher Hümā-yı şān u şevket şem-i ikbāline pervāne Muʿinī Ḥażret-i Ḫallāḳ iken her bir umūrunda O şāhıŋ sāye-i şāhānesinde ḫalḳa pervāne Dem-ā-dem rāḥat ü asāyiş-i nāṣa eder ġayret Refāḥ-ı ḥāl-i ʿālemdir emel ol şāh-ı ẕī-şāna Cihāna luṭfı zāhir nāṣa raḥm ü şefkati bāhir ʿAṭā vü himmeti şāhāne eṭvārı mülūkāne Hünerverlikde himmetde kemāl-i saʿy ü ġayretde Cihān bir yana ol şāh-ı maʿarif kānı bir yana Ne cānı var ki ḳılsın müddei bu kavlimi inkār Abes̱ mi dāʿiyem ḥācet mi iştişhād ü burhāna Be-ʿavn ü luṭf-ı Īzid ḳādirem daʿvāmı is̱bāta Değil ḥācet tevāriḫ ü tevāriḫ-āşināyāna Ayāndır günden işte bir gün ol şeh Ḳaṣr-ı Yıldız’da Alıp dest-i hümāyānına ikbāl ile şeşḫāne Ḳılup fermān-ı dikkat biŋ yüzellibeş adım cāye Bir aʿla beyze-i mürg-i şütür dikdirdi meydāna Ḳırup ol beyzeyi ibḳā-yı nām içün bu menzilde Hüner meydānına ḥaḳḳā nişān vazʿ etdi merdāne Nice taḥṣīn edüp tārīḫ-i aʿlā yazmaya Vāṣıf Söz olmaz hiç kemāl-i şāh-ı vālā-re’y ü Cem-şāna 1227