Nedîm’in şiirinde noktasız harflerin toplamı 1140 tarihini verir.

Nedīm Dīvān’ında aynı şiirin devamı olarak bulunan beyitler:
Şehenşāh-ı hümāyūn-pāye Sulṭān Aḥmed-i Ġāzī
Ki şāmildir cihāna re’feti ebr-i bahār-āsā

O ḫāḳān-ı kerīmü’ş-şān ki dest-i luṭf u iḥsānı
Mis̱āl-i çeşme-i ḫūrşīd mülkü etmede iḥyā

O İskender-ḥaşem kim eyledi tesḫīr Īrān’ı
Cüyūş-ı saṭveti cūş eyleyip mānende-i deryā

Eder çün Kaʿbetullāh’ı ḫirāset ol şeh-i ʿālem
Onuŋçün dā’imā te’yīd eder her kārını Mevlā

Ḫulūṣ ile eder çün kim tevāżuʿ ḫırḳa-ı pāke
Ḳılar rūḥ-ı Resūlullāh feyżi-y-le onu iʿlā

O ḫāḳān-ı cihānıŋ maẓhar-ı elṭāf u iḥsānı
Beşīr Ağa o ẕāt-ı bī-ʿadīl-i mekremet-pīrā

Ki olup bir zamān Şeyḫü’l-ḥarem ʿizz ü saʿādetle
O dergāh-ı refīʿiŋ ḫidmetiyle buldu istiʿlā

Mücerreb olmağ-ile her cihetten ṣıdḳ u iḫlāṣı
Onu ḳurbuyla iḥyā eyledi ḫāḳān-ı mülk-ārā

Edip Dārü’s-saʿāde manṣıb-ı ʿālīsini iḥsān
Niçe demdir eder ẕātı-y-le faḫr ol mesned-i vālā

Melek-ḫaṣlet muʿallā-menzilet Ağa-yı ʿālī-şān
Kemāl-ı ḥüsn-i ḫulku-y-la nihād-ı pāki müstes̱nā

Reşīd ü kārdān u hūş-merd ü sāḥib-i temkīn
Feżā’il-perver ü kāmil-pesend ü ʿāḳil ü dānā

Duʿā-yı ḫayr celb etmek içün ḫāḳān-ı devrāna
Edip ḫayrāta meyl ol ẕāt-ı vālā-şān-ı bī-hemtā

Bu mevḳiʿ çār-sū vü mecmaʿ-ı nās olmağın bunda
Kemāl-i mertebe muḥtāc idi bir çeşme-i zībā

Bu āb-ı pāki icrā eyleyip ʿaṭşāna luṭf etti
ʿAceb tevfīḳa maẓhar oldu ol sāḥib-himem Ḥaḳḳā

ʿAceb maṭbūʿ-ı vālā oldu el-ḥaḳ ṭarḥ-ı dil-cūsu
Görenler ez-dil ü cān ettiler taḥsīn-i müstevfā

Ḳılıp bānīsiniŋ ʿömrün füzūn ʿizz ü saʿādetle
Ḳabūl ede bu ḫayrātın cenāb-ı Ḫālıḳü’l-eşyā

6= cihānıŋ: İÜ TY 2829, cihān kim || 9= vālā: İÜ TY 2829, ʿulyā || 12= etmek içün: Halet Efendi 675, etmektedir； devrāna: Mihrişah 377, ẕī-şāna || 13= çeşme-i: Mihrişah 377, çeşmeye.

İÜ TY 2829’da başlık: Tārīḫ-i çeşme-i Ağa-yı Dārü’s-saʿāde. SK Halet Efendi 675: Tārīḫ berā-yı çeşme-i zībā[-yı] cenāb-ı Beşīr Ağa. SK Mihrişah 377: Tārīḫ-i çeşme-i Beşīr Ağa, Ağa-yı Dārü’s-saʿāde. SK Yahya Tevfik 308: Tārīḫ-i çeşme-i Ağa-yı Dārü’s-saʿāde.