Ferīdūn-bār-gāh İskender-i devrān Ḫān Maḥmūd Kim ednā mehteri ḫande ider ordu-yı Ḍaḥḥāḳ’e Felek çetr-i muʿallāsın temāşā itmege her gün Der-i vālā-yı mehter-ḫānesinde yüz sürer ḫāke Kerāmetle bu dergāh-ı bülendi eyledi maʿmūr Virür seyr ü temāşāsı feraḥ ḳalb-i elem-nāke Yine mümkin degil evc-i sipihr-i bāmına irmek Sürūşān bāl u per virse hümā-yı ʿaḳl-ı çālāke Bi-vech-i şerʿ ü ḳānūn itdi dīn ü devleti iḥyā Ki tārīḫe yazıldı ḳayd olundı ṣakk-ı ṣakkāke Ḳodı encüm-şumārī ḫaymeler eflāk şeklinde Melekler itdi sābāşı bu vażʿ-ı şāh-ı derrāke Cihād-ı fī-sebīlillāh ile meşġūldür her dem Ki tīġ-ı cān-sitānı teşnedir aʿdāyı ihlāke O Mehdī-i zamān taḫta çıḳup tīġın ḳuşandıḳda Kemāl-i ḫavf u dehşet düşdi ḳalb-i ehl-i işrāke Ser-ā-ser sāye-i ʿadlinde olsun ʿālem ābādān Ḫudā āsāyiş ü rāḥat vire bu ḫıṭṭa-i pāke S̱üreyyā reşk ider tārīḫ-i encüm-tābına ʿAynī Yeŋiden oldı mehter-ḫāne maʿmūr irdi eflāke (1230)