Şehinşāh-ı zamān Sulṭān Maḥmūd-i celīlü’ş-şān Revān mīzāb-ı kilkinden ’uyūn-i re’fet ü iḥsān Teşebbüs eyledi dāmān-ı şerʿ-i faḫr-ı kevneyne Anı ẕātına ḳıldı sāyebān-ı maʿdelet-unvān Sikender feyż-i reʿyinden eger etseydi istimdād Olurdu āb-ı ḥayvān dergehinde nāgehān cūşān Meded-res teşnegān-ı tīh-i ẓulme āb-ı şemşīri Degil aḥdinde beydā-yı cefāda kimse ser-gerdān Rukūd-i ābına dāʿir şikāyet eylese gevher Olur ṣuyu revān-baḫş eyler ise cerrine fermān Gül-i ḥāl-i ahālī cūy-ı ʿadli ile ḫandāndır Meger dest-i ’aṭāsından denānīr eyleye efġān Vücūdu ʿayn-ı raḥmet olduġuna iki şāhiddir Cebīn-i enverinde nūr-i dīn ü pertev-i īmān Kerīman-ı zamānıŋ cūd-i iḥsānı muvaḳḳatdir Bu sulṭān-ı kerāmet rūz u şeb olmaḳda sīm-efşān Rıżā-cūyī-i Ḥaḳda etdi naḳd-i himmetin mebẕūl Bu cāy-ı dil-güşāda eyledi īcād şādırvān Ne şādırvān-ı bī-hemtā ne zībā ṭarḥ-ı rūḫ-efzā Bunuŋ resmin görünce oldu hep ressāmlar ḫayrān Bu ṣu āb-ı ḥayātıŋ süd ḳarındaşı mıdır ṣorsam Ki şīrīn-kāmī-i cāvīde mālik nūş iden ʿaṭşān Leṭāfetde müşābihdir bu āb-ı nāb tesnīme Bunuŋ sāḳīsini gönderse cennetden revā rıḍvān Ṣarīrin gūş edip baḳ ʿayn-i taʿzīm ile bu ʿayna Hemīşe olmada tesbīḥ-gūy-ı ḥażret-i Yezdān Gönüllerde leb-i cū seyrine hīç ḳalmadı hāhiş Bu mevḳī’ oldu nüzhetgāh-i ehl-i dānīş ü irfān Serīr-i salṭanatda müstedām olsun o şāhinşāh Cihānda tā ki nūş-ı ābdan ʿatşān ola reyyān Emīn altın ṣuyıyla eyledim tārīḫini taḫrīr Maḥalli cūdıdır Sulṭān Maḥmūd’uŋ bu şādırvān 1153