Hüvel Feyyāż Ḥażret-i şehriyār-ı heft-iḳlīm Ḳutb-ı ʿālem ḫıdīv-ı kisrā-dād Yaʿnī Sulṭān Aḥmed-i S̱ālis̱ Yāver olsun oŋa çihār evtād Öyle bir pādişāh-ı ʿārif kim Bāyezīd eyler andan istirşād Oldu daʿvāt-ı devlet ü cāhı Ḳudsiyāna żamīme-i evrād Bir vezīre muvaffaḳ etdi anı Kerem-i bī-dirīġ-i Rabb-i ʿibād Merḥametkār u mekremet-pīşe Cūd-endīşe Āṣaf-istiʿdād Ṣıhr-ı aʿẓam yegāne-i ʿālem Menbāʿ-ı ʿilm ü ḥilm ü rüşd ü sedād Ṣadr-ı Ḥātem-nihād İbrāhīm Bahr-ı kef Āṣaf-ı kerem-muʿtād Çünkü ebr-i bahār-ı luṭfundan Ḥurrem oldu bu ravża-i īcād Oldu şād-āb-ı cūy-ı iḥsānı Bāġ-ı ʿālemde bende vü āzād Ḳıldı himmet Çubuḳlu’ya yaʿnī Yapdı bir ʿayn-ı pāk ü ṣāf-nihād Ḥabbeẕā cilvegāh-ı bī-hemtā Ġıbṭa-fermā-yı Ḫalluḫ u Nevşād Etdi bir ḥavż ile yine şimdi Revnaḳın ol mesīreniŋ müzdād Ḥavż ammā buḫayre-i ḳulzüm Ḥavż ammā ki ḥavż-ı cūy-nejād Bir gün ol kūhsār-ı vālāya Geldi devletle ol hizebr-i cihād Seyre iḳbāl edip saʿādetle Ser-i ḥavża olunca pāy-nihād Dedi ol ṣadr-ı Bayḳara-çāker Feyż-i aḳdesden edip istiʿād Baʿdezīn bu mesīre-i ḫāṣıŋ Nāmı olsun cihānda Feyż-ābād Bayḳara tācın attı şevḳinden Sāl-i tārīḫin eyledim taʿdād Oldu ḥaḳḳā ki bī-bedel tārīḫ Cāy-ı dil-cū maḳām-ı Feyż-ābād sene 1134