Besmeleyle idelüm fetḥ-i kelām Fetḫ ola tā bu muʿāmmā-yı be-nām Olmasa besmele resmi memdūd Cins-i eşyāda olur muydu vücūd Bilmeyen şevket-i bismi’llāhı Aŋlamaz sırr-i kelāmu’llāhı Bārekallāh zihī sırr-ı lāṭīf Bulur anuŋla şeref naẓm-ı şerīf Göre ʿizzetle süṭūr-ı muṣḥaf Ḳarşı durur aŋa gūyā ṣaf ṣaf İbtidāsında olan bā’sı anuŋ Başları tacıdurur esmānuŋ Fikr iderseŋ o ḥurūf-ı memdūd Oldı ser-ḥadd-i ekālīm-i şühūd Bāġ-ı vaḥdetde nem-i luṭf ile pür Gūyīyā besmele bir sünbüldür Nāẓır olsaŋ oŋa āyīne-mis̱āl Görinür ʿārıż-ı luṭf-ı Muteʿāl Gösterür āyīnesi besmelenüŋ Ḥilye-i pākin o vech-i ḥasenüŋ İttifāḳ itdi bu maʿnāda ümem Ezherü’l-levn idi faḫr-ı ʿālem Ḳaplamışdı yüzini nūr-ı sürūr Sūre-i Nūr idi yā maṭlaʿ-ı nūr Vech-i berrāḳını Aṣḥāb-ı Ṣafā Humreti ġālib idi dir ḥattā Aŋa virmişdi kemāl-i zīnet Kātib-i çehre-güşā-yı fıṭrat Hem dimişler durur eşrāf el-Ḥaḳ ʿĀrıż-ı pāki ʿaraḳ-nāk olıcaḳ Dāne-i dür gibi rūyında teri Ḫoş-nümā eyler idi ol güheri Derledigince olurdu ḫoş-bū Berg-i gül gibi o rūy-ı nīgū Daḫı ol mefḫar-ı mevcūdātıŋ Yaʿnī peyġamber-i ferruḥ-ẕātıŋ