Bu raṣadgāh-ı cihāna necm-i baḫt-ı ḫusrevān Fer verelden görmedi Maḥmūd Ḫān’ıŋ şevketin İstemem Şeh-nāme kiẕbin dinlemem efsāneyi Kim açar ‘anḳā yanında mākiyānıŋ ṣoḥbetin Ġayretinden dīn uġurunda eder cānın fedā Dīn uġurunda gören ol şehriyārıŋ ġayretin İrtifā‘-ı menzilet kesb etdi ṣādık ḳulları Sāye-veş yerlerde ḳaldı bilmeyenler ni‘metin Bir ocaġı ḳaldırıp yüz biŋ ocaġı ḳıldı şen Dest-i düşmenden ḫalāṣ etti Muḥammed ümmetin Yoluna etmez mi dünyā ṭobdan īs̱ār-ı cān Sā’iri gördükçe ṭobçu ḳullarına raġbetin Şānına lāyıḳ mıdır Ṭob-ḫāne yaptırdı demek Eyledi iḥyā o ḫāḳān āl-i ‘Os̱mān devletin Varmadan üç māha manṣūr oldu ‘avn-i Ḥaḳḳ ile Cāmi‘-i Ṭob-ḫāne’niŋ ḳoymuşdu nām-ı nuṣretin Bilmeyen var ise ṣāḥib-vaḳti bilsin ba‘d-ez-īn Bu muvaḳḳit-ḫāne īmā etti şān ü şöhretin Luṭfunuŋ yetdi bütün dünyāya nıṣf-ı fażlası Ceyb-i iḥsānından almaz mi muvaḳḳit kısmetin Kefçe-i mīḳātı tevbīḫ etmege başın ṣalar Pādişāhān-ı zamān bilsiŋ ‘ayār-ı saṭvetin Aṣılırdı bu muvaḳḳit-gāha mīḳāt-ı felek Görse māh-ı rūzede Ṭob-ḫāne’niŋ cem‘iyyetin Yol verirse Ḥaḳ geçer ḫūrşīd bir sūrāḫden Aŋı remz eyler yazanlar irtifā‘ın ḥikmetin Etse çok mu mihr-i re’yi ḳāfdan ḳāfa güzār Bir şehinşāhıŋ ki Mevlā basṭ edince ḳudretin Ḫayṭı taḥrīḳ edemez bād-ı muḫālif ba‘d-ez-īn Rūb-ı meskūn çekmez artıḳ rūzigārıŋ miḥnetin Bilmeyen ṣā’im ṣanır günler ḳıṣaldı rūzede Ḫalḳa ifṭārın felek çekdirmez oldu ḥasretin Tevbe etti devr-i nā-hemvārına gerdūn daḫı Ḳorḳudan terk eyledi herkes muḫālif ‘ādetin Başına dönsün dönerse böyle ḫūrşīd-efseriŋ ‘Aḳlı var ise felek bilsiŋ o şāhıŋ ḳıymetin Lāyıḳıyla pādişāh şarṭınca ẓıllu’llāhdır Gün-be-gün müzdād ede Allāh ẓıll-ı ref’etin İki tārīḫ-i mücevher ‘arż eder her gün felek Bilse ‘İzzet tā ki ol mihr-i cihānıŋ himmetin Dāver-i devrān yaptırdı muvaḳḳit-ḫāneyi Mülki iḥyā etmeniŋ ol şāh buldu rāḥatın el-Faḳīr Yesārī-zāde Muṣṭafā ‘İzzet ġufire lehümā