Vālī-i Mıṣr Meḥemmed ’Alī Paşa-yı celīl Nīl-i luṭf u keremin eyledi ’aṭşāna sebīl Yād edip ḫayr ile maḫdūmu Ṭosun Paşa’yı Rūḥuna celb-i du’ā eyledi bā-ẕikr-i cemīl Ecrini rūḥuna meşrūṭa edip niyyetle Bir sebīl etdi binā ḳıldı anuŋ içün tesbīl Āb-ı cān-perveri etdikçe ‘iṭāşı reyyān Yazılır ḥaşre kadar defterine ecr-i cezīl Cevher-i āb ile gencīnesi oldu memlū Himmeti ‘illet-i ġā’iyyesini etdi teshīl Bir sebīl oldu ki dünyāda naẓīri nā-yāb Belki Cennetde olur çeşme-i tesnīme ‘adīl Zencebīle olunur luṭf-ı mizācı tercīḥ Selsebīle ḳılınır ṭa‘m-ı leẕīẕi tems̱īl Ṭās-ı sīmīni ede māh-ı nevi reşk-āver Āb-ı şīrīni eder çeşme-i mihri tebcīl Burc-ı ābī gibi eṭrāfı kevākible ṭolu Rūz u şeb ehl-i raṣad onları eyler ta‘dīl Delv-i sīmīni ġurūbunda olur māha bedel Cām-i zerrīni ṭulū‘unda olur mihre mes̱īl Ḳaṭreden baḥre eder ehl-i naẓar istidlāl Ẕerreden mihre çeker nūr-ı baṣīretle delīl İşte bu menheli ol dāver-i dād-ārānıŋ Vüs‘at-i lücce-i elṭāfına burhān-ı celīl Meşreb-i ṣāfı gibi menhel-i ‘aẕbı üzre Çevrinip etmededir ḫalḳ naṣībini taḥṣīl Ḥiṣṣe-i “Naḥnu ḳasamnā” da bu da dāḫildir Rıẕḳ-ı maḳsūm olunur ehline böyle tavṣīl Nūş eder bāy u gedā ṣuyuŋ alıp bī-teklīf Kimseye ẕerre ḳadar minnet olunmaz taḥmīl Mā-i ṣāfī gibi bir nimet-i pākīẕe mi var Cümle eşyāya cihān içre odur rükn-i aṣīl Ḥayretā ḥarf-ı mücevher-ile mıṣrā‘aynın Her biri başḳaca tārīḫi olundu tertīl Yapdı tevfīḳ-i Ḫudā birle sebīl-i ‘ālī sene 1236 Ṣāfī āb etdi Meḥemmed ‘Alī Paşa tesbīl sene 1236