Devletde Meḥemmed ʿAlī Paşa-yı yegāne Çoḳ manṣıbı iḥrāz ile buldu şeref ü şān Ḍarb-ḫāne ü Ṭob-ḫāne ve mābeyn müşīri Ser-ʿasker ü ṣadr oldu niçe kerre ḳapudān Ṣıhr eyledi hem ẕātını şāhenşeh-i ʿālem Buldu niçe iḳbāl u niçe rifʿat ü ʿunvān Bir āṣaf-ı memdūḥ u dilīr idi ne çāre Āḫir anı da ḳıldı hebā şīve-i devrān Ol dāver-i ẕī-şānı ecel ġāʾib edince Ḫāṭırları ḳıldı elem-i hicri perīşān Rūḥu içün ecr ü ḥasenāt etmege taḥsīl Oldu ḥarem-i muḥteremi vāsıṭa-cūyān Yapdırdı bu ṣahrınc ile şu şādırevānı Şād oldu ʿArab Cāmiʿi semtindeki sükkān Ṣu zaḥmeti çekmede idi erdi refāha Bi’l-cümle ahālī-i maḥalle ile ʿaṭşān Ḥaḳḳā ki güzel ḫayr-ı ʿazīm oldu yerinde Şāmil es̱er-i luṭfı benī ādeme her ān Ḥaḳ yoluna bu āb-ı revān işte revāndır Alsın ṣu tavazzī edip içsin gelen insān Gördükçe cihān ḫalḳı menāfiʿ bu es̱erden Elbette Ḫudā ecr-i cezīlin eder iḥsān Merḥūm olup maġfiret ü raḥmete vāṣıl Ser çeşme-i Kevs̱erden ilāhi ola reyyān Hem zevce-i ẕī-şānı o sulṭān-ı mükerrem Çoḳ ḫayra muvaffaḳ ola durduḳça bu ekvān Hem duḫter-i saʿd-aḫteri iḳbāl-i şerefle ʿĀlemde bula ʿāfiyet ü ʿömr-i firāvān Bu beyt ile ʿaṭşānı Senīḥ eyle ki tebşīr Her mıṣraʿı tārīḫ-i tamāmın eder iʾlān Buldu ṣuyunu şādırevān oldu baḳ inşā Ṣahrınc-ı metīn ḳıldı binā ʿĀdile Sulṭān 1285