Şehenşāh-ı cihān Sulṭān Maḥmūd-ı felek-dergāh Sezādır dergehinde bende olsa dāver-i Dārā O sulṭān-ı kerīm ü bende-perver ḫusrev-i dehriŋ Ḫayır-ḫˇāh-ı ṣadef-kārı [vü] ẕāt-ı ekmel ü dānā Yegāne bende-i merġūb ḫāṣṣü’l-ḫāṣṣ-ı maḳbūlü Aġa-yı ḥażret-i Dārü’s-sa‘āde ol kerem-fermā Kerīm-i ṣāf-ṭīnet dāver-i ġayretkeş-i devlet Esās-ı ma‘delet miknet-şinās bu ‘alī binā O ẕāt-ı muḥterem memdūḥ-ı ‘ālem dāver-i Ekrem Cihānı luṭf u cūd u himmetiyle eyledi iḥyā O ẕātıŋ āyet-i iḫlāṣına burhān-ı ḳāṭ‘ıdır Bu nev tertīb-i zībā bu bihīn ās̱ār-ı nev-peydā Mu‘allā medrese dil-cū sebīl ü tekyegāh-ı nev Münevver mekteb ü dārü’l-kitāb-ı bī-bedel Ḥaḳḳā Nümūdār olmamış ems̱āli mir’āt-ı cihān içre Ki eşbāh-ı neẓā’irden muġarrā her biri zīrā Maḥallinde ḫülāṣa ḫayr-ı pāk-i bī-naẓīr oldu Vere bānīsine Feyyāż-ı Muṭlaḳ ecr-i lā yuḥṣā Viḳāye eyleyip āfātdan ẕāt-ı keremkārıŋ Mü’eyyed eyleye ṣadr-ı rif‘atinde anı Mevlā Saḥn-ı ṣubḥ-ı ma‘ārif pīşgāhıŋ her biri gerçi Bu nev ḫayr-ı bedī‘a nice tārīḫ etdiler inşā S̱enā-ḫˇān-ı ḳadīmi Ni‘met-i dā‘ī daḫi böyle Edip evṣāf-ı ẕāt-ı midḥat-ās̱ārı ile gūyā Dedi itmāmına tārīḫ içün bu beyt-i ġarrāyı Ki noḳṭa ḳonmaz el-Ḥaḳḳ olsa ṭāḳ-ı bābına imlā Bu dārü’l-‘ilm-i bālā ṭarḥı li’llāh eyleyip bünyād Hele bu bābda iḥyā-yı ‘ulūm etdi Beşīr Aġa 1158 Ketebehu ‘abdü’d-dā‘ī el-Ḥāc İsma‘īl ġufira ẕünūbehu