(1) Ḥālā deryā ḳapudanı Vezīr-i mükerrem Cezāyirli Ġāzī Ḥasan Paşa (2) ḥażretleriniŋ Tersāne-i ’Āmire’de ve Aḳbaba Yokuşu’nda ve Ḳāsımpaşa (3) derūnunda müceddeden binā ve inşā buyurduḳları çeşme-hāy-ı müteʿaddidelerine (4) icrā olunan yedi māṣūra māʾ-i leẕīẕleriniŋ sebāt ve devāmı-çün (5) işbu taḳsimiŋ bendiniŋ hengām-ı ḳāʾim-maḳām-ı ʿālī-maḳāmlıḳlarında emvāl-i (6) mütevāfire ṣarfiyle der [ü] dīvārını terfīʿ ve tanẓīm buyurduḳlarını ve daḫi ḳaṣaba-i (7) merḳūme sāḥilinde Ḳalyoncu ʿasākirine maḫṣūṣ ḳışlaḳ-ı hümāyūna icrā olunan (8) üç māṣūra ve daḫi işbu biŋ iki yüz senesi evāʾili tārīḫiyle bend-i meẕkūru (9) temelinden zirve-i aʿlāsına degin taʿmīr [ve] evvel maṣārifiniŋ üçü miḳtārı emvāl-i mütevāfire (10) ve mütekāsire ṣarfiyle tecdīd ve taʿmīr-i küllī ile taʿmīr buyurduḳlarına bināʾen mütevellisi (11) inhāsiyle bā-ḫaṭṭ-i hümāyūn-i şevket-maḳrūn ve bā-hüccet-i şerʾiyye ḳışlaḳ-ı meẕkūr (12) ḫāricinde bināsına muvaffaḳ olduḳları çeşme-i cedīdelerine ve ḳışlaḳ-ı (13) meẕkūr derūnuna ve sāʾir diledikleri maḥalle icrā buyurmaları şart (14) ve taʿyīni ile bir defʾa daḫi on iki māṣūra ki muḳaddem ve muʾaḫḫar (15) defʾa-i s̱elās̱ede iḥsān-ı hümāyūn buyrulan cemʿan yigirmi iki (16) māṣūra māʾ-i leẕīẕleri olduğunu vaḳt ü zamāniyle beyān ve ifāde (17) żımnında işbu levhā taḥrīr ve bu maḥalle vażʿ olundu. Sene 1200