Zihī ḳuṭb-ı zamān ʿAbdülmecīd Ḫān ibni Maḥmūd Ḫān Eder devrānda feyż-i Hū ile iḳbālini iʿlā Sezā bīʿat ederse dest-i iclālin ṭutup şāhān Kerāmetle olur baḳ şevket ü şānı cihān-ārā Edip ḳabr-i cenāb-ı Sünbül’e ḥürmet o şāhinşāh Yapıp bu ḫānḳāhı ḳıldı sünbülzār-ı bī-hemtā Bu dergeh Bāyezīd Ḫān-ı Velī ʿaṣrında yapıldı Cemāl-i Ḫalvetīye oldu aḳdem mesken ü meʾvā Olunca ḥacca ʿāzim Mıṣ’rdan celb etdi dāmādın ʿAzīzim Yūsuf-ı Sünbül Sinān’dır mürşid-i aʿlā Olup pīr-i ṭarīḳat niçe dem irşād edüp nāsı Vefātında makāmın eyledi Merkez Efendi cā O da devrānı tekmīlde Yaʿḳūb Efendi’dir Bu cāyı eyleyen Yûsuf gibi zīb-āver-i maʿnā Sinān Efendi kim bu ḫānḳāha şeyḫ olduḳda Onu Sulṭān Süleymān eyledi şeyḫü’l-ḥarem vālā Ḥasan nāmında bir ẕāta reşādet el verip āḫir Ġubār-ı maḳdemi oldu niçe dem kuḥl-ı nūr-efzā ʿAlāaddīn Kerāmeddīn ve ʿAdlī nām mürşidler Meşīḫatle bu yerde ḳıldı üçler gibi istiʿlā Gelince Şeyḫ Eyyūbī Meḥemmed nām bir āgāh Sülûk erbābına gösterdi seyr-i ʿālem-i bālā Cenāb-ı ḳuṭb-ı Nureddīn Efendi bin ʿAlāaddīn Olup atmış ṭoḳuz yıl bu maḥalde şeyḫ-i müstes̱nā Vefātında gelüp necl-i kerīmi Şeyḫ Ḳuṭbuddīn Reşādetle füyūz-ı ẕikri ḳıldı maʿnīde icrā Bu cāda ṣoŋra Hāşim ibni Hāşim ibni Hāşim’dir Eden vefḳ-ı müs̱elles̱veş meşīḫat nüsḫasın imlā Olunca Şeyḫ Yıldız nûr-bahşâ cāy-ı irşāda Bu sünbülzāra ziynet verdi yıldız çiçeği āsā Şehinşāh-ı cihānıŋ sāyesinde Şeyḫ Râżī’dir Olan bu dergeh-i feyż-intimâda câ-nişîn hâlâ Bu dergāhı o ḫāḳān-ı zamān abād edip ḳıldı Gelen bunca ẕevāt-ı evliyā ervāḥını iḥyā Bu cāya şeyḫ olan bunca ẕevāt ervāhını yā Rab Muʿīn ḳıl şāh-ı devrāna be-câh-ı ḥālet-i esmā Dü tārīḫ-i mücevher söyle Zīver beyt-i vāḥidde Verilsin ẓāhir ü bāṭında naẓma şöhret-i maʿnā Gül-i gülşen-serāy-ı salṭanat ʿAbdülmecīd Ḫāndır 1267 Ḳılan bu ḫāneḳāh-ı Sünbül’i zībende vü ihyâ 1267 Ketebehu Yesārīzāde Muṣṭafā ʿİzzet ġufire lehumā