Kitabede olmayıp Dîvânda olan beyitler:

Cūy-bār-ı ʿadl ü re’fettir vücūd-ı kāmili
Menbaʿ-ı ʿayn-ı keremdir ẕāt-ı pāk-i ekremi

Āsitān-ı devletin ḳılmış melāẕ-ı ḫusrevān
Eyleyen onu şehenşāhān-ı dehriŋ aʿẓamı

Cism-i düşmen āhen olsa nerm eder bir ḥamlede
Zūr-ı dest ü ḳuvvet-i bāzū-yı baḫt-ı muḥkemi

Ṣavletin seyr edip ol sāḥib-ḳırān-ı ʿālemiŋ
Vaṣf edenler nādim oldu Ḳahramān u Rüstem’i

Şimdi efvāh-ı cihān şehnāme-ḫvān-ı vaṣfıdır
Ṭuttu zīrā nām-ı pāki şeş cihāt-ı ʿālemi

Her maḥalle bir es̱er vaẓʿ eyleyip Allāh içün
Mā’il-i vādī-i ḫayrāt oldu ṭabʿ-ı ḫurremi

Üsküdār’ı āb-ı rūḥ-efzā ile iḥyā edip
Dest-i cūdu ḳıldı sīrāb ol sevād-ı aʿẓamı

Mis̱li nā-yāb bir güherdir ṣuyunu bulsun deyü
Ṣu yerine beẕl u īs̱ār etti bī-ḥad dirhemi

Meşreb-i pāk-i nihādı üzre etti intiḫāb
Bu maḥalli ol ḫıdīv-i berr ü baḥriŋ emcedi

Şevket u şānın ziyāde ḳalbini şād eyleyip
Neydüğün göstermesin Ḥaḳ oŋa ʿömründe ġamı

Mesned-i şevkette iḳbāl ile Mevlā ḥaşre dek
S̱ābit etsin ol şehenşāh-ı hümāyūn maḳdemi