Şāhenşeh-i mülk-i cihān İskender-i devr-i zamān Ārāyiş-i kevn ü mekān Sulṭān Maḥmūdü’ş-şiyem Şems-i Hidāyet’dir yüzü bedr-i Dirāyet’dir özü Lübb-i Belaġat’dur sözü ḫāḳān-ı İskender-ḫatem Ḥallü’r-rumūz-ı müşkilāt Keşşāf-ı rāz-ı Mübhemāt Kenzü’l-künūz-ı mülhemāt Muḫtār-ı şāyān-ı ehem Mişkāt-ı ḥıfẓında her ān Miṣbāḥ-ı ‘adliyle hemān Tenvīr-i Ebṣār-ı cihān eyler o Kenz-i pür-himem Alsa ele tīġ u sinān ḫūn ola re’s-i düşmenān Olur Şaḳāyıḳ-veş ‘ayān Bostān rezm içre o dem Ol Ravża-i baḥr-ı ‘Aṭā vüs‘atde böyle vāḳı‘ā Baḥr-ı muḥīt olsa sezā gül-ġonca-i fażlında nem Ṣarf-ı nuḳūd-ı himmeti yaptı Binā-yı devleti Muḥkem-Esās-ı şevketi ḳıldı şāh-ı muḥteşem Neşr-i ‘ulūma sa‘y edip Ḫaḳḳā kütüb-ḫāne yapıp Vaż‘ eyledi nice kütüb etdi cihānı Muġtanem Āsār-ı şāh-ı kāmkār verdi ‘ulūma iştihār Bir nüsḫanıñ ṣadrında var biñ Me’haz-ı Ḳaṣdü’l-ümem Eşbāh u Eşkāli ‘adīm Gencīne Dür-i Naẓīm Nüzhetgeh-i şab‘-ı selīm Kenzü’l-le’ālī-i ḥikem Ḥaşmet dedim bir bī-bedel tārīḫ-i ġarrā ṭarḥına Ṭullāba bir kenzü’l-‘ilim yapdı şeh-i mülk-i kerem