Ṣad bārekallāh bārekallāh ol şeh-i pür cūd kim Desti cihānı eyledi müstaġraḳ-ı baḥr-ı ʿaṭā Ol pādişāh-ı baḥr u berr ḫāḳān-ı İskender-es̱er Ṣāḥib-livā-yı muʿteber şāhenşeh-i fermān-revā ʿAdl ü kerāmet menbaʿı şems-i velāyet maṭlaʿı Dergāhınıŋ her mıṣraʿı şehbāl-i sīmurġ u hümā Ol ḫusrev u ferḫunde-dem Dārā-yı İskender-ḥaşem Āb-ı ruḫ-ı ʿOs̱māniyān dürr-i yem-i cūd u seḫā Ecdādı ervāḥını şād etti o sulṭān-ı cevād Ḫayr u müberrātı ziyād oldu seleften bī-merā Buldu ṣuyun dīn ü düvel mīzān-ı ʿadl ile güzel Sīrāb olur her bir maḥal luṭf ile pür-neşv ü nümā İskender-āsā evvelā edip kemerlerde binā Sedd ile ḳıldı cemʿ-i mā ol dāver-i kişver-küşā Cūş edip İstanbul’a āb oldu ricāli kāmyāb Sulṭān-ı dīne şeyḫ u şāb etmektedir ḫayr-ı duʿā Yā şehr-i pāk-i Üsküdār olmaz mı reşk-i her diyār Enʿām-ı luṭf-ı şehriyār edip oŋa icrā-yı mā Her sūda ḳıldı āşikār niçe ʿuyūn-ı ḫoş-güvār Sāḥilde ḫod ol çeşmesār āyīne-i ʿālem-nümā Ḥaḳ ʿömrünü efzūn ede ḳalbin ṣafā-meşhūn ede Āfāttan me’mūn ede şāh-ı cihānı dā’imā Ās̱ār-ı ḫayrı dem-be-dem etmekte ḫalḳı muġtenem Şimdi bu cāy-ı muḥarrem oldu ʿaceb cāy-ı ṣafā Me’mūr-ı ḥükm-i muḥkemi olup vezīr-i aʿẓamı Yaʿnī vekīl-i ekremi dāmādı İbrāhīm Pāşā Bu cāyı ābādān eden icrāsını fermān eden Bu ʿaynı nev-bünyād eden kim olmaya mānend oŋa Edip o da ṣarf-ı himem ṣu yerine ḫarc-ı direm Yapıldı az müddette hem bu çeşme-i feyż-āşinā Olduḳça cārī rūz u şeb her lūlesi olmaz ʿaceb Ḫıżr u Sikender teşne-leb olursa ger sāġar oŋa Bu ʿayna ey ṣāfī-derūn destiŋi Kevs̱er gibi ṣun Her ḳaṭresi ṣafvet-nümūn olmaḳta zīrā cān-fezā Ḥaḳḳā kim oldu bī-naẓīr bu çeşmesār-ı dil-peẕīr Bānīsine ecr-i kes̱īr iḥsān ede Bārī Ḫudā Bāb-ı Hümāyūn’a ḳarīb devlet-sarāya verdi zīb Maʿmūr ede Ḥayy-ı mucīb bu ḫayrı tā rūz-ı cezā Tārīḫi ger ilhām ola şabʿ-ı hümāyūna nola Pīrāyedir İstanbul’a bu ṭarḫ-ı sulṭānī binā Edip şeh-i ferḫunde-fāl inşā vü tārīḫin ḫayāl Bu mıṣraʿ-ı şīrīn me’āl oldu şeref-baḫş-ı revā Sāmī bi-āyāti ḳadīm etmem durūġ Allāh ʿalīm Şāhid yeter şabʿ-ı selīm budur me’āl ü müddeʿā Ḳādir midir inşādına tanẓīriniŋ īcādına Şāʿirleriŋ üstādına levḥ [ü] ḳalem işte ṣalā Olup şehenşāh-ı cihān ḫayra muvaffaḳ her zamān Ede mü’eyyed kāmurān Ḫallāḳ-ı bī-çūn u çerā Ser-tāc olan tārīḫ içün bu mıṣraʿ-ı pākizedir Aç besmeleyle iç ṣuyu Ḫān Aḥmed’e eyle duʿā