Şāh-ı ẕī-seyf ü ḳalem ḫāḳān-ı manṣūrü’l-ʿalem Dāver-i deryā-kerem dād-ār-ı İskender-nedīm Ġāzī Ḫān Maḥmūd-ı ʿAdlī-şān kim şāyestedir Rūz u şeb vird eylese ʿālem duʿāsın ʿan-ṣamīm Bir kerem-şān şāh-ı ʿālemdir ki taḫt-ı devlete Gelmedi mis̱li diyü ḳılsam yemīn olmam as̱īm Bir seḫā-yı ṭabʿı vardır kim o şāh-ı ekremin Baḫş eder bir bende-i ednāsına biŋ kīse sīm Her sene vaḳf-ı hümāyūndan edip baḫş-ı nuḳūd Ḳıldı māh-ı rūzede icrā bir ās̱ār-ı cesīm Eyleyip beş yüz Seferli Ketḫüdāsına kerem Ḳıldı mesrūr ol ʿināyet kānı ḫāḳān-ı kerīm Cāme-şūybaşıya fermān buyurup elli ġurūş Sāʾir aġayāna yirmişer ġurūş ḳıldı resīm Baḫşiş-i mā’-ı buḫūra daḫı her yıl żamm edip Luṭf u iḥsān ile ḳıldı ḳulların şād-ı ʿaẓīm Ketḫüdāya baḫş edip beş yüz ġurūş bāḳīlere Eyledi onar ġurūş iḥsān ber-vech-i ʿamīm Ḥaḳ edā-yı şevketin manṣūr edip ol dāverin Seyfini ḳātı’ ḳıla aʿdāsını ḳahr u ʿadīm Vāṣıfā tārīḫi zeyn olsun çü tīġ-i cevherīn Ḳıldı Maḥmūd Ḫān Seferli oṭasın şād u besīm 1232 el-Faḳīr Yesārī-zāde Muṣtafā ʿİzzet ġufire lehümā