Penāh-ı dīn ü devlet Vālide Sulṭān-ı ‘ālī-şān Mükerrem māder-i Sulṭān Aḥmed Ḫān-ı mülk-ārā Riyāż-ı cennet etmişdir cihānı yümn-i ās̱ārı Odur ‘ālemde şimdi ‘āmir-i ma‘mūre-i ‘uḳbā Ola şāyeste-i ġufrān-i Bārī ẕikr-i bi’l-ḫayrı Hemīşe maṣdar-ı envā‘-ı ḫayrāt eyleye Mevlā Li-vechi’llāh olup bu cāmi‘e ṭarḥ-efken-i bünyād Ṭarīḳ-i Ḥaḳda bir ‘ālī es̱er etdi yine iḥyā Bu cāmi‘dir melāẕ-ı sübḥa-gerdān-ı ḫulūṣ-āyīn Bu cāmi‘dir meṭāf-ı Ḳudsiyān-ı ‘ālem-i bālā Cemā‘at penç vaḳt iḫlāṣ-ile gülberg-i da‘vātı Muḥammed Muṣṭafā rūḥ-ı şerīfine eder ihdā Zihī ferruḫ ‘ibādetgāh-ı pür-feyż-i muḳaddes kim Derūnu ḥālet-efzādır mis̱āl-i Ka‘be-i ‘ulyā Ḳubāb-ı saḳf-ı pāki künbed-i gerdūn ile hem-ser ‘İmād-ı ṭāḳ-ı berrāḳı ‘amūd-ı ṣubḥ ile hem-pā Müşebbek revzen-i rūşen-nihādı maṭla‘-ı envār Mu‘allā maḥfel-i şāhenşehi mihr-i żiyā-baḫşā Beyāż-ı şem‘-i miḥrābı şu‘ā‘-ı naḫl-ı nūr-endūd Sevād-ı dūde-i ḳandīli kuḥl-i dīde-i ḥavrā Mücellā ol ḳadar her cām-ı billūrı ki ‘aksinde Nümāyān oldu eşkāl-i nuḳūş-ı ṭārem-i mīna Muḳavves ebruvān-ı ṭāḳına cevzā kemer-beste Muḳarnas ṭurre-i maṭbū‘ına ḫūrşīd ruḫ-fersā Verā-yı ebr-i şerme girdi ġayretle hilāl oldu Görince mehce-i ‘ālem-fürūġun ġurre-i ġarrā Ḥarīm-i dil-keş-i pehnāveri ḫarmengeh-i ṭā‘at Ruḫām-ı ferş-i ṣaḥnı gevher-i gencīne-i taḳvā Olaydı aṭlasında naḳş-ı encüm çarḫ-ı vālānuŋ Düşerdi pīşgāhında Ḫatāyī būrıyā-āsā Zülal-i ḥavżı icrā etdi ḥükm-i āb-ı ḥayvānı Ḳuru bir nāmı ḳaldı çeşme-i Ḫıżr oldu nā-peydā Şarāb-ı Kevs̱eriñ ‘aynı demek cüsbān idi Kevs̱er Olaydı neşve-baḫş-ı teşnegān-ı sāḥa-ı ġabrā Menārı serv-i zībende ḫırām-ı gülşen-i tevḥīd Mü’eẕẕinler hezār-ı naġme-perdāzı anuŋ gūyā Nigeh-pīrā-yı enẓār-ı ḫired her şekl-i merġūbı Mücessem nūrdur ser-tā-ḳadem bu cāmi‘-i vālā Olup zühhād-ı ‘ālem çehre-sā-yı ḫāk-i dergāhı Du‘ā-yı ḫayr-ı sulṭānī cihānı eyler istīfā Kemāl- i‘tiḳād-ı pāk ile iḫlāṣa mebnīdir Ki tevfīḳ etdi Bārī aŋa böyle ḫayr-ı müstes̱nā Şürū‘-ı vaż‘-ı bünyādına kim tārīḫ ola ḫūrşīd 1120 ‘Aceb mi neyyir-i a‘ẓam gibi olsa şeref-pīra Sezādır Tā’ibā derc eyleyip bir beyt-i ma‘mūre İki tārīḫ eyle ḥüsn-i ḫitāmın etseler imlā Maḥallinde yapıldı Vālide Sulṭānıŋ ās̱ārı 1122 Güzīde beyt-i ṭā‘āt-ı İlāhī ma‘bed-i zībā 1122